«Zhangyru» كورپوراتيۆتىك وقىتۋ» جوباسى اياسىندا وسى ۋاقىتقا دەيىن 50 قاتىسۋشى ەكى اپتا قاتارىنان «جەكە كوشباسشىلىق», «بيزنەس», «ۇكىمەتتىك ەمەس ۇيىمدار» مودۋلدەرى بويىنشا ءبىلىم العان بولاتىن. ەكى اپتا قاتارىنان جيناعان بىلىمدەرىن بيزنەس كەيس جاساۋعا جۇمساعان قاتىسۋشىلاردىڭ ىشىنەن 10 ۇمىتكەر ىرىكتەلىپ الىندى.
ءبىلىم بەرۋ, جەكە كوشباسشىلىق داعدىسىن ۇيرەتۋ, كاسىپتى جانە الەۋمەتتىك كاسىپكەرلىكتى ءتيىمدى جۇرگىزۋگە بەيىمدەۋ ارقىلى ادام كاپيتالىن دامىتۋدى ماقسات ەتكەن جوباعا ەلىمىزگە تانىمال بيزنەس پەن بۇقارالىق اقپارات وكىلدەرى قازىلىق ەتتى. قازىلار قۇرامىندا استانا قالاسى ترانسپورت قاۋىمداستىعىنىڭ توراعاسى, «قازاقستان 2050» جالپىۇلتتىق قوزعالىسى كەڭەسىنىڭ مۇشەسى مەدەت قۇرمانوۆ, بەلگىلى تەلەجۋرناليست, قر ينۆەستيتسيا جانە دامۋ مينيسترلىگىنىڭ قوعاممەن بايلانىس دەپارتامەنتىنىڭ باسشىسى – ءمينيستردىڭ كەڭەسشىسى بەرىك ءۋالي, «وردا-استانا» كوپسالالى سەرۆيستىك كومپانياسىنىڭ باس ديرەكتورى ەۆگەني بولگەرت, «GenevaBusinessSchool» وكىلدىگى» اق اتقارۋشى ديرەكتورى توعجان جۇماعۇلوۆا, «جوبالاردى باسقارۋ تەحنولوگياسى» جاۋاپكەرشىلىگى شەكتەۋلى سەرىكتەستىگىنىڭ ديرەكتورى يۆان چۋبيسوۆ بولدى.
تاڭدالعان ۇمىتكەرلەر وزدەرىنە بەرىلگەن ۋاقىت ىشىندە بيزنەس كەيستەرىن قورعاپ, قازىلار القاسىنىڭ سۇراقتارىنا جاۋاپ بەردى.
قازىلار القاسىنىڭ شەشىمىمەن MBA باعدارلاماسى بويىنشا وقۋعا 25% جەڭىلدىكتەر ۇلجان قوقىباسوۆا مەن مادينا كۋسمانوۆاعا, 50% جەڭىلدىك عالىم داۋسەيىتكە, 75% جەڭىلدىك باقىت قۇداباەۆاعا بەرىلسە, باستى گرانت دوسان قاۋمەنگە بەرىلدى.
جوبانى ۇيىمداستىرۋشى – «قازاقستان 2050» جالپىۇلتتىق قوزعالىسى كەڭەسىنىڭ توراعاسى مۇحتار مانكەەۆتىڭ ايتۋىنشا, «Zhangyru» كورپوراتيۆتىك وقىتۋ» جوباسى رۋحاني جاڭعىرۋ تاقىرىبى اياسىندا وتكىزىلىپ وتىر.
«بۇل جوباعا ەلىمىزدىڭ ءار وڭىرىنەن 200-دەن استام ادام قاتىسۋعا تىلەك ءبىلدىردى. ءبىز قازىلار القاسىن قۇرىپ, ولاردىڭ ىشىنەن 50-ءىن جوبا قاتىسۋشىسى رەتىندە تاڭداپ الدىق. تاڭداپ الىنعان 50 قاتىسۋشى ەكىاپتالىق ترەنينگتەرگە قاتىستى. قاتىسۋشىلار وزدەرىنىڭ ماقساتتارى مەن مىندەتتەرىن جۇيەلەي ءبىلۋدى, ەموتسيونالدىق جاعداي مەن بيزنەستى باسقارۋ ستراتەگيالارى تۋرالى ءبىلىم الدى. جوبالاردى باسقارۋعا ارنالعان جاڭاشا تاسىلدەردى جۇزەگە اسىرۋدى ۇيرەندى. مۇنىڭ بارلىعى ازاماتتاردىڭ كاسىبي بىلىكتىلىگىن جاڭعىرتۋعا باعىتتالعان. ءبىزدىڭ وسى جوبامىزعا قولداۋ تانىتىپ, باس سەرىكتەس بولعان «SamrukKazynaTrust» الەۋمەتتىك جوبالاردى دامىتۋ قورى ەرەكشە ءرول اتقاردى. سونداي-اق, «GenevaBusinessSchool» وكىلدىگى» اق مەن «جوبالاردى باسقارۋ تەحنولوگياسى» جشس بىزگە بارىنشا قولداۋ تانىتتى», - دەدى م.مانكەەۆ.
جەڭىمپازدار 2018 جىلعى ناۋرىز ايىنان باستاپ, 2 جىل بويى شۆەيتساريالىق وقۋ ورداسىنىڭ باعدارلاماسى نەگىزىندە ءبىلىم الاتىن بولادى. وقۋ ورنىن ءساتتى اياقتاعان تۇلەكتەرگە مۆا دارجەسى بەرىلەدى.
